Bangla Minister-in State Museum a tlawh

Mizorama chám mek Bangladesh state minister for Water Resources Muhammad Nazrul Islam chuan nimin khan Falkawna Zokhua leh Mizoram State Museum a tlawh a, hmanlaia Mizo sûlhnu hrang hrangte a en. Art & Culture department-a curator Lalchuailova leh a thawhpuite'n dawngsawngin, thilpek an lo hlan.

Bangladesh Minister hian Zokhua a tlawhnaah, an ram ṭhenawma Mizote khawsak
ṭhin dan te, an inrêlbâwl dan leh nunphung ṭha tak takte leh ziaráng a taka a hmuh theih avangin lawmawm a tih thu a sawi a, "Mizo lalte'n khua leh tui an enkawl dante leh zawlbuk hmanga nunphung an inzirnate chu hriatreng tlak a ni," a ti.

State Museum a tlawhnaah Muhammad Nazrul Islam chuan, Mizote pípúte nun dan phung leh an hmanruate a hmuh aṭangin culture ropui tak nia a hriat thu a sawi a; Mizote hmanlai nun hriat belhna chuan Mizoram leh Bangladesh inunauna leh inkungkaihnaah thil ṭha zawk a thlen a beisei thu a sawi a bawk.

Bangladesh State Minister hi Bangladesh deputy high commissioner Zokey Ahad-a'n a ṭawiawm a ni.