Tourism minister pahnih inkâwm

Tourism minister Lal-nghinglova Hmar chuan nimin khan sorkar laipuia Tourism minister Gajendra Singh Shekhawat chu a chenna inah a kâwm a; tourism lama Mizoram hmasawnna tura hmalak mekna leh hmathlirte a sawipui.

Lalnghinglova Hmar chuan, Mizoramin tourism-ah theihna sang tak a neih thu sawiin, a bikin eco-tourism leh adventure tourism-ahte India hmunpui nih theihna khawp a awm thu Union Minister a hrilh a, "Hun rei tak chhung Mizoramah tourism potential a awm thu sawi a lo ni tawh ṭhin. Tunah chuan sawi ringawt loin, theihna hai chhuak turin a tak taka thawh kan duh," a ti a; Mizoram hmathlirte tihlawhtling turin sorkar laipui, a bikin Union Tourism Minister puihna an mamawh dawn chauh thu a sawi.

Kum 2024 chhungin khual­zin nuai nga chuangin Mizoram an tlawh thu sawi­in Lalnghinglova chuan, "Mizoram mipui zat aṭang­in 50% deuhthaw a ni. Tun aṭanga hun rei lo têah Sairang thleng rêl a luh dawn avangin tourism hma­­sawnna kawng a in­hawng zau sawt dawn," a ti.

Gajendra Singh She­khawat chuan, Mizorama tourism hma­sawn nan theihtawp a chhuahpui tur thu sawiin, khualzin tam zawk hîp thei turin hmunhma neih ṭhat piah lamah, state sorkar leh mipui inbuatsaih a, rilru sûkthlêk thlenga inhawn a ṭul thu a sawi.

Union Tourism Minister hian project lian tham leh ro tling zel siam ṭhin tur leh private investor-te thawhpui uar turin Mizoram Minister hi a lo ràwn a; sorkar laipuiin tourism sector-ah SASCI aṭangin sum tam zawk dah a tum thu a sawi bawk.