CAA hi India-a sakhaw dang vuantute nêkchêpna a ni lo - Home Affairs MoS

Union Home Affairs minister of state Nityanand Rai chuan nimin khan Siaha leh Lawngtlai a tlawh a; autonomous district council sorkar hotute leh official-te nen inkâwmin, Citizen Amendment Act chu ram chhunga sakhaw dang vuantute nêkchêpna a nih loh thu a sawi.

Nityanand Rai hian nimin zing dar 8:30 khan Siaha a thleng a, MADC Chief Executive Member (CEM) banglaah a pualin inkhawm buatsaih a ni. Minister chuan, prime minister Narendra Modi-a'n hmarchhak state-te a ngaih pawimawh thu sawiin, "India ram hmasawnna atana pawimawh chu hmarchhak state-te'n hma an sawn phawt a ni," a ti a; BJP-in sorkarna fawng a vawn tirh aṭangin hmasawnna tam tak hmuh tur a awm thu a sawi.

Minister chuan, Citizenship Amendment chungchang sawiin, "Ram chhunga sakhaw dang vuantute nêkchêpna a ni lo a, ram ṭhenawm leh ram danga sakhuana vanga tihduhdah tuarte tan zalen taka an chên theih nan leh India ramah sakhaw hrang hrang vuantute zalen taka an awm theihna atana duan a ni," a ti.

Nityananad Rai chuan, Siaha district chu ram dang nena inrî a nih avangin ramri vennaah mipui ṭawiawmna a pawimawh thu a sawi a; pianpui ṭawng ngeia zirlaite'n an zir theih chu National Education Policy 2020 thil tum pawimawh pakhat a nih thu a sawi. Mipui aiawha a kawmte'n a hnena an thlenteah theihtawp chhuahpui a tum thu a sawi bawk.

MADC CEM M Laikaw chuan, 6th Schedule amendment chungchang sawiin, ADC-te'n thuneihna sang zawk an neih theih nan hma lakpui turin Union Minister a ngen.

MHA Minister of State hian Siaha aṭangin Chawngte a pan a, Chakma Autonomous District Council (CADC) hall-ah CADC CEM Molin Kumar Chakma kaihhruaiin inkawm khawmna hun hman a ni a, CEM-in CADC dinhmun tlangpui a sawi bakah, CADC mamawhte ziakin a hlan.

Nityanand Rai chuan, harsatna hrang hrang a hnena an thlente chu sutkian a nih theih nan a theihtawp chhuahpui a tum thu a sawi a, "India ram hi ram changkanga siam turin sorkar laipuiin theihtawp a chhuah a, One Nation One Ration Card, New Education Policy 2020, inkalpawhna leh hriselna lamahte flagship scheme pawimawh tak tak duana kalpui mek a ni," a ti.

Inkawmhonaah hian Lawngtlai DC Cheemala Siva Gopal Reddy leh SP Lokeshwaran R, CADC executive member-te leh MDC-te pawh an tel.

Nityanand Rai hi Bihar MLA Devesh Kumar-a'n a ṭawiawm a, nimin tlai khan Mizoram chhuahsanin Delhi a pan a ni.