KHAWTHLIR

MHA-in CM kâwm

Mizo History Association hruaitute chuan nimin khan chief minister Lalduhoma chu a pisaah an hmu a, Mizo ṭobul chhui chungchang leh history kaihhnawih thil pawimawhte an sawipui. Mizo History Association hi an president Prof. Sangkima’n hoin an thawk chhuak a ni.

AICC Convention

April 8-9, 2025 khan Ahmedabad, Gujarat-ah All India Congress Committee (AICC) Convention neih a ni a, Mizoram aṭangin MPCC president Lal Thanzara, treasurer Dr Lalmalsawma Nghaka, All India Adivasi Congress Committee member Zodintluanga Ralte leh MPCC hruaitu dang - CS Thanga, Dr Lallianchhunga, Dr Henry Zodinliana Pachuau te an tel.

Kuhva rah man

Assam Rifles sipaite chuan nimin khan Ruantlang leh Ṭiau lui inkara ramhnuaiah dan loa lak luh kuhva rah thuhrûk ip 49 an man a, Champhaia Customs Preventive Force hnenah an hlan.

Minister ring tâwk

ZPM Ṭhalai chuan thuchhuah siamin, lei dawh belh zel turin PWD minister Vanlalhlana an rin tâwk thu an tarlang. ZPM sorkar hnua lei dawh tawhte leh sorkar laipuiin a pawm tawh PMGSY-III hnuaia Chângte lui, De lui, Tuipawl lui, Zawlpui lui, Tuisen lui, Sailungrek lui leh Tuichâng lui tea lei pasarih dawh belh turte tarlangin ZPM ṭhalaite chuan, "PWD Minister hi kan ring tâwk a, Pu Vanlalhlana enkawlna hnuaiah chuan MPCC leh MNF sorkar lei dawhte angin a chim ve lo turah kan ngai," an ti.

MCAB branch thar

Mizoram Cooperative Apex Bank (MCAB) branch thar, Chawlhhmun Branch chu nimin khan bialtu MLA TBC Lalvenchhunga'n a hawng. Chawlhhmun Branch hi MCAB branch 31-na a ni a; MCAB hian financial year kal mek chhungin thingtlang lamah branch thar paruk hawn belh an tum a ni.