Sorkarin buhhûm qtl 1,472.80 a lei tawh

Food, Civil Supplies and Consumer Affairs minister B Lalchhanzova chuan April 8, Thawhlehni khan Mizoram sorkarin Mizorama thar buh (buhhûm) a lei khawmna hmun Om Om Modern Rice Mill, Pangbalkawn a tlawh a; December 19,2024 aṭangin sorkarin buhhûm quintal 1,472.80 a lei tawh thu a sawi.

FCSCA Minister chuan, December 19, 2024-ah buhhum lei ṭan a nih thu sawiin, "Vawiin thlenga sorkarin buhhum a lei tawh chu qtl 1,472.80 a ni a, hei hi Rs 4,418,400 man a ni. Sorkarin a tum ber chu farmer-te'n incentive dawng ṭha se, sorkar sum senso a tam deuh a nih pawhin nakin zelah Mizoramina buha kan intodelhna atana pawimawh tak a nih dawn avangin sorkar chu a inhuam a ni," a ti.

Kolasib district agriculture officer Joseph Lalnuntluanga tarlan danin, Om Om Modern Rice Mill-a buhhum leinaah hian a tlangpuiin loneitute'n buhhum an ken khawmte chu Nilainiah enfiah a ni ṭhin a, Ningani-ah lei khawmin, Zirtawpniah document tihfel ṭhin a ni a, a kar lehah a man pek a ni ṭhin.

Om Om Modern Rice Mill neitu Runremsangi chuan, an Rice Mill chu kum 2017-ah an din ṭan a, March 17, 2022-ah hawn a nih thu a sawi a; tunah chuan duhthusama tam buh her tur an hmuh loh avangin Fair Average Quantity kalpui loin, an hmuh ang ang an her thu sawiin, "Hun lo kal zelah buh her tur tam tham zawk a awm chhoh kan beisei," a ti.

B Lalchhanzova chuan, Mizoram sorkarin state páwn aṭangin thla tin buhfai tam tham tak a lak luh ṭhin thu sawiin, "Lak luhna atan hian sum tam tak state páwnah a chhuak ṭhin," a ti a; Mizorama loneitute'n an buh tharte aṭanga hamthatna ṭha zawk an neih theih nan sorkarin Paddy and Rice Procurement Committee dinin, Mizoram thar buh a lei khawm tih a sawi.

Supply Minister chuan, buhhum leina tura buaipui ngaite buaipuinaa FCSCA leh Agriculture department-te'n thawhhona ṭha tak an nei chu lawmawm a tih thu a sawi a, "Buha kan intodelh theih nan te, monsoon stock hnianghnar tak a awm theih nan leh loneitute'n an thar chhuahte awlsam zawka an tihral theih nan kawng hrang hrangin sorkarin ruahmanna a siam mek a ni," a ti.

FCSCA secretary Teresy Vanlalhruaii pawhin thu sawiin, Mizorama loneitute thar buhhum sorkarin a leisak chuan loneitute phûrna thar a pek a, buh tam zawk Mizoramah thar a nih phah ngei a beisei thu a sawi.

Om Om Modern Rice Mill-ah hian Bána Kaih policy hnuaiah Mizorama thar buhhum kg. khat Rs 30-in a lei a ni.