Manipur MLA Vungzagin hmuak

Manipur-a Thanlon constituency aṭanga MLA atana thlan tlin Vungzagin Valte chuan nimin khan Manipur-a haw turin Delhi aṭangin Lengpui Airport a thleng a; Mizo Students Union (MSU) huaihawtin Lengpui Airport-ah hmuah a ni a, Champhai North bialtu MLA H Ginzalala, adviser to CM pawh a tel.

MSU thuchhuah tarlan danin, Vungzagin Valte hi Manipur-ah adviser to CM a ni a, Manipur-a tualchhung buaina a chhuah tirh khan Zo hnahthlakte a hum avangin Meitei hoin kut an thlak a, na taka hliamin, hun rei tak chhung Delhi-ah enkawl a ni. Vungzagin Valte chuan, Delhi aṭangin Manipur-ah haw tlang loa Mizoram a tlawh hmasak chhan chu, Mizoram sorkar leh mipuite'n Manipur Zo hnahthlakte tana theihtawp an lo chhuahna leh an lo dawnsawn danah lawmthu sawi a duh vang a nih thu a sawi.

Lengpui Airport bula hmuahna inkhawmah MLA H Ginzalala chuan, Vungzagin Valte leh a chhungte tawrhna chu a thlawn dawn lo tih a sawi a, "Kan tawrhna hi a rapthlak a, Mizoram sorkar pawhin pawi a ti hle. Kan tawrhna hi a thlawn dawn lo a, rah ṭha a la chhuah dawn a, Pathianin Zo fate min hruai khawmna tur kawnga a dah pakhat, a remruat a nih ka ring," a ti.