LC-te tan TB zirhona buatsaih

National Health Mission hnuaia State TB Cell leh Aizawl Municipal Corporation chuan nimin khan AMC Auditorium-ah corporator leh local council member-te pualin ngawr (TB) zirhona an buatsaih a; Aizawl mayor Lalrinenga Sailo chuan, TB ûm bo tumna tihlawhtlingtu ni turin LC-te a ngen.

Zirhona hi state TB officer Dr Zochhuanawmi'n a kaihruai a; State TB Cell-a medical officer Dr Vanzarliana'n TB chungchanga hriat tur pawimawhte a sawifiah a, Aizawl Mayor leh municipal commisisoner Joseph H Lalramsanga ten thu an sawi.

Lalrinenga Sailo chuan, TB chu natna inkai darh theih a nih avangin a venna leh donaah ṭanrual ṭul thu sawiin, "TB vei hi a zahthlak loh a, zah avanga mual liam ta an tam a, zahpui loh vanga dam a ṭha zawk," a ti a; LC-te chu khawtlang hruaitu lu an nih angin hriselna lama veng tihmasawntu leh hma latu nih tum tur leh TB ûm bo tumna tihlawhtlingtu nih tum turin a chah a ni.

Zirhonaah hian LC member eng emaw zat chu mimal leh LC hmingin TB veite chawṭha hmanga ṭanpuitu (Nikshay Mitra/donor) ni turin an intiam a ni.