Railways coach-te nen thawhho kan duh - Tetea Hmar

Sports & Youth Services minister Lalnghinglova Hmar chu nimin khan New Delhi-ah Railway Sports Promotion Board (RSPB) secretary Prem Chand Lochab leh a thawhpuite nen an inkâwm a; Mizoram infiammite dinhmun hriat nan leh hmasawn nan infiamna thlan bikah Indian Railways team nen inelna buatsaih ṭhin an rêl.

Lalnghinglova Hmar chuan, Bana Kaih - Empowering Mizoram Sports (EMS) hnuaiah Indian Railways coach/trainer ṭhate Mizoramah chah luh an duh tih a sawi a, "Mizoram sorkarin Olympic 2036 hmathlir nei chunga Bana Kaih - EMS a kalpui turah infiammi national level-a khel pha ṭhin kan neihte hman ṭangkai an ni dawn a, Indian Railways coach-te nen thawhho kan duh a ni," a ti.

Prem Chand Lochab chuan, Sports Minister thu thlen chu tihhlawhtlin ngei a tum tur thu a lo hrilh a; Minister-in a sàwm angin April 26, 2025-a neih tur Aizawl International Half Marathon-ah Indian Railways runner leh infiammi an tel ngei nan hma a lak tur thu a sawi.

RSPB hnuaia Mizo infiammite an luh theih dan tur an sawiho a, Mizoramah sawi chhunzawm turin an dah a ni.