Lungleia tui tui sem chhuak vek turin thla khat vel nghah a ngai

Lunglei Municipal Council (LMC) hotute leh Lungleia PHE department hotute chuan April 8, Thawhlehni khan Lunglei khawpuia tui harsatna thleng mek leh harsatna sutkian dan tur an sawiho a; Lungleia tui connection neite hnenah tui sem chhuak vek turin thla khat vel nghah a ngaih tur thu tarlan a ni.

Ṭhutkhawm hi LMC chairman Lalzuithanga'n a kaihruai a; PHE department hotute chuan, tun dinhmunah Lungleiah tui connection 16,012 a awm mek a, chung mite hnena tui sem chhuak vek tur chuan thla khat dáwn nghah a ngaih tur thu an sawi.

PHE Lunglei Water Supply Maintenance Division-a executive engineer V Laldanmawia chuan, kumina tui kang chu kum dang aia a nasat thu sawiin, "Ruah a sûr mai loh chuan buaina lian zawk tawk thei kan ni. PHE lam chuan tui pump-na tur khawl nei ṭha mah se, pump tur tui a awm miau loh avangin Lunglei khawpuiin harsatna lian tak kan tâwk a ni," a ti.

Ṭhutkhawmah hian LMC vice chairman K Lalrinawma, executive councillor-te leh Chief Executive Officer an tel a; lui tui kang vanga Lunglei mipuite'n harsatna an tawh mek dan leh tui harsatna su kiang tura hmalak dan turte sawiho a ni.