Medical Operational Team-te'n Duty-te thinhrik lo turin an ngen

Medical Operational Team for Covid-19 hotute chuan nimin khan thuthar thehdarhtute an kâwm a; Covid-19 vanga theihtawp chhuaha thawktu medical duty-te thinhrik lo turin mipui an ngen.

Medical Operational Team (MOT) chairman Dr ZR Thiamsanga, MLA chuan, Covid-19 donaa a hmatáwngte chu medical lama thawktute an nih thu sawiin, "Mi tam takin min thinhrik ṭan a, an in luah aṭanga hnawhchhuah tâwk dawn dawnte an awm. Duh vanga damlote hi enkawl kan ni lo a, mipui an him theihna atan rál doin kan inpe a ni. A hlauhawm tur chin chu kan inchhuah lo a, damdawi-in lamah kan dah a, a haw chin hi chu an hlauhawm loh," a ti.

Dr ZR Thiamsanga chuan, Covid-19 kai an awma inenkawlna turin inbuatsaih lâwk a nih thu sawiin, "ZMC hi Covid-19 atan dedicated hospital a ni. ZMC-ah hian khum 200, ICU pasarih, NICU panga leh isolation ward 30 a awm," a ti a; ZMCah an leng lo a nih pawhin khum 30 ve ve awmna, Trinity Hospital leh MCON hostel-te hman tura ruahman lâwk a nih thu a sawi.