PHE-in tui ren turin mipui chah

Public Health Engineering (PHE) department chuan Aizawla chengte tan tui thianghlim in tur theihtawpin an buaipui mek tih thuthar thehdarhtute an hrilh a; chutih rualin, tui ren turin mi tin an chah.

PHE hotute sawi danin, Covid-19 vangin Aizawl khawpui chu lockdown/curfew mek a nih avangin inah mi an awm deuh vek a, tui mamawh pawh a san phah hle. Mipuiin tui an tlakchham loh nan PHE department-a SE chin hnuai lam - EE, SDO, JE leh thawktu dangte nen mi 450 vel ni tin tui buaipuiin an duty ṭhin.

Tui pump tu, a semtu, a viltu engineer-te thlenga mipui ṭawiawmna an dawn ṭhat avangin PHE hotute chuan lawmthu an sawi a; tui buaipuia veng hrang hranga kalte chu ṭawi awma lo puibawm zel turin mipui, task force leh police duty-te an ngen a ni.