Covid-19 doin roreltute'n ke an pen

Covid-19 dona kawnga hmalaknaah ram roreltute an che chhuak mek zel a,  local level task force-te hnenah ṭanpuina an pe hlawm.

Assembly speaker Lalrinliana Sailo chuan nimin khan a bial Chalfi lh constituency-a khaw 24-a village task force-te hman turin Rs. 8,00,000 leh kutkawr leh hmai tuamna ṭhahnem tak a pe. Health minister Dr R Lalthangliana chuan ni tin mamawh phurtu lirthei lian khalhtute hman turin hmai tuamna 1,000 leh kutkawr 1,000 a pe a, FCSCA Director hnenah a hlân a ni.

Minister of state TJ Lalnuntluanga chuan Ningani khan a bial Champhai South chhunga village task force-te hnenah Rs. 2,35,000 leh hand sanitizer eng emaw zat a hlan. Health & Family Welfare Board vice chairman Dr ZR Thiamsanga, Champhai North bialtu MLA chuan a MLA fund aṭangin Champhai District Task Force on Covid-19 hnenah Rs. 5,00,000 a hlân.

Lengteng bialtu MLA  L Thangmawia chuan Saitual leh Khawzawla district level task forcete hman turin Rs. 1,00,000 ve ve a pe a; Lengteng bial chhung khaw 20-a village task force-te hnenah Rs. 1,17,000 a pek bakah, Ngopa SDO (Civil) kaltlangin April thla ration sem nghak zo lo turte hnenah buhfai quintal 14.5 a sem bawk.

Aizawl West-III bialtu MLA VL Zaithanzama chuan March 26 khan a bial chhunga local task force duty-te a tlawh kual a, pawisa leh hand sanitizer  a pe. MADC-a MDC HC Lalmalsawma Zasai chuan Siaha district medical team-te hman tur walkie talkie pali leh Rs.10,000 a thawh a, district bawrhsap hnenah a hlan. a hlan.