Supply Minister-in kudamte a enfiah

Food, Civil Supplies & Consumer Affairs (FCSCA) minister K Lalrinliana chuan nimin khan Tanhrila FCI kudam leh Zuangtuia Supply kudamte a tlawh a; truck driver-te'n FCI kudam aṭanga Zuangtuia Supply kudama buhfai buk tura an phurh hreh chhan a enfiah. Tun hnaiah Tanhrila FCI kudam weighbridge aiin Zuangtuia supply kudam weighbridge (buhfai phur truck bukna) chu a buk a zân zawk avangin truck driver-te'n buhfai phurh luh an hreh a, chu chu Minister-in a enfiah a, Zuangtui Supply kudama weighbridge chu hman chhunzawm tawh rih loh turin a hriattir.

FCSCA Minister chuan, "Mizoram Truck Drivers’ Association (MTDA) leh MizoramTruck Owners’ Association (MTOA)-te'n Mizoram mipui rilṭáma kan awm phal loa theihtawp an chhuah hi a lawmawm tak zet a ni," a ti a; buhfai rel wagon 68 Bairabi-ah a ding mek tih sawiin, "A phur tur truck indaih loh vangin tunah hian MLA-te leh mi tlawmngaite'n an truck-te an thawh a, a ṭul chuan sorkarin ruahmanna dang a siam zel ang," a ti.

Local task force-te thawhrimna fakawm a tih thu sawiin Minister chuan, "Mizoram mamawh supply phur luttute hi screening paltlang thlap, a him tawka ngaih an ni a, ṭha taka lo ṭanpuia tikhawtlai lo tur leh a hun taka an thil phurhte an thlen theih nan ṭanpui a pawimawh," a ti a; retailer-te'n ration buhfai man DCSA/Supply centre-a an pek lâwk ṭhin chu a pangngaia kalpui tur a nih thu leh delivery order tihchhuah hnuah a ṭul angin Supply department aṭanga re-imburse leh a nih tur thu a sawi.