Mizoramah 2024-25 chhungin lirthei 22,608 ziah luh a ni

Mizoramah financial year 2024-25 chhung khan lirthei ziah luh thar (vehicles registered - on road) 22,608 a awm a, kum 2023-24 chhunga lirthei register aṭangin 7.30%-in a pung.

Transport department chhinchhiah danin, kum 2023-24 tawp ni, March 31, 2024) thleng khan Mizoramah lirthei 3,09,832 ziah luh a ni a, sorkar kum liam ta 2024-25 tawp ni March 31, 2025 khan lirthei 3,32,440 ziah luh a ni thung. Kum khat chhunga a inthlauhna hi lirthei 22,608 a ni a, kum 2023-24 aṭanga kum 2024-25 a lirthei punna chu 7.30% a ni.

Kum 2024-25 chhunga lirthei ziah luh thar 22,608 zingah hian two wheeler 18,062 awmin a tam ber a, ziah luh thar zawng zawng aṭangin 79.89% a tling. Two wheeler hi motor car-in dawtin 2,930 ziah luh thar a ni a; ziah luh tam ber leh a dawttu inthlauhna hi 15,132 a tling.