Loneitute'n hna an thawh theih nan Ruahmanna siam a ṭul - Agriculture Minister

Agriculture minister C Lalrinsanga chuan, thingtlanga loneitute'n hna an thawh theihna atan leh an thar chhuahte an hralh theihna atan ruahmanna siam ni se a duh thu a sawi. Vanglaini palai zawhna chhang in Agriculture Minister chuan, thingtlang loneitu lam aṭang in harsatna an tawh report department-in an dawn nual tawh thu sawiin, "Tunah chuan Covid-19 avangin hma latu ber chu task force-te an ni rih a, an thu ngaihchân a ngai.

Loneitute harsatna hi chinfel a nih theihna atan hma la turin State Level Task Force Chairman (Chief Secretary) hnenah rawtna ka 

thlen tawh," a ti. C Lalrinsanga chuan, "Thlai tam tak rei dahṭhat theih lohte a awm. Mipui pawhin thlai ei tur kan mamawh a, ei tur nei loa kan awm maite pawh a hlauhawm. Mipuite'n an thar chhuah an leina aṭang chuan loneitute'n an buhzém an tikhat ve leh ṭhin a ni," a ti a, loneitute leh mipuite chu in mamawh tawn an nih thu a sawi. Agriculture Minister chuan local task force strict deuh awmnaah loneitute'n harsatna an tawk tih a sawi a, "Loneituten hna an thawk thei lo reng a nih chuan harsatna nasa tak an tâwk dawn a ni. An lo hi an ei hmuhna ber a ni si," a ti.