LESDE minister Lalnghinglova Hmar-in thawhpuiah Japan Embassy a sáwm

Labour, Employment, Skill Development & Entre­preneurship (LESDE) minister Lalnghinglova Hmar chuan April 9, Nilaini khan New Delhi Mizoram House-ah Japan Embassy-a first secretary pahnih - Hagiwara Ryusuke leh Tsubakimoto Mayumi te a kâwm a; Japan Embassy kaltlanga Mizo ṭhalaite tana hamṭhatna awm theite sawipuiin, thawhpuiah a sáwm.

Lalnghinglova Hmar chuan, Mizoram ṭhalaite’n thil an thiam chak thu leh a bikin kum upa tamna ramin a mamawh - nursing, caregiving leh hospitality sector-ah Mizo ṭhalaite theihna a sàn thu a sawi a, "Japan-in demand a nei a, keini’n supply kan nei. Tun hnaiah LESDE department hmalaknain Mizo ṭhalai eng emaw zat chuan Japan-ah hna an thawk tawh a, hei aia liana kalpui kan duh," a ti.

Mizo ṭhalaite’n Japanese culture an ngaih­ven thu leh Mizoram hmun hrang hranga cosplay-ah pawh pholan ṭhin a nih thu sawiin Minister chuan, "Hei hi intihhlimnaa tàwp mai loin, eizawnna tling, Mizoram leh Japan thlunzawmna hmanrua pakhat ni thei se," a ti a; Japanese organisation-te nen thawhho an duh thu a sawi.

Sports minister ni bawk Lalnghinglova Hmar hian Mizoramin Olympic 2036 vision an neih thu Japan sorkar palaite a hrilh a; Olympic discipline thlan chhuahah Japan International Cooperation Agency (JICA) aṭangin Mizoramin sports coach a dil mek thu sawiin, a ṭul anga bawhzuisak turin a ngen a ni.

Japan Embassy official-te chuan, Mizoram leh Mizo ṭhalaite chanchin chu ngaihnawm an tih thu leh an phûr thu an sawi a; India state dangte nen khaikhinin Mizoram aṭanga Japan rama hnathawk an la tam loh thu leh, Mizo ṭhalaite tana sorkar hmathlir hrang hrang tihlawhtling turin thawhpui an inhuam thu Minister hi an hrilh.

Caregiving leh nursing sector-ah Mizo ṭhalaite theihna an hre tawh tih sawiin Japan Embassy hotute chuan, infiamna leh cultural exchange hmanga Mizoram leh Japan thlun zawmna nghet zawk zawn ṭha an tih thu an sawi a; India ram chhung leh pawna Japanese organisation-te nen thawhho theihna turin theihtawp an chhuah tur thu an sawi bawk.