KHAWTHLIR

KṬP-in thisen pe

KṬP, Ramhlun Vengthlang Branch chuan an din champha pualin nimin khan an kohhran hall-ah thisen pek an huaihawt a, Synod Hospital tan thisen unit 28 an pe a, petute mipa 24 leh hmeichhia pali an ni.

Lung tlain delh hlum

Nimin tlai dar 4:30 vel khan Ngaizelah lung a tla a, mi pakhat a delh hlum. Thu dawn danin, lung tla hian Tachhip aṭanga Aizawl pana tlân scooty a delh a, scooty-ah hian Lalfakawma, Tachhip fate Aizawla inentir tura kal Lalbiakdika leh Zonunmawii te an chuang. An pahnih hian Alpha Hospital panpui nghal an ni a, Lalbiakdika (24) hi a hliam tuar loin tlai dar 5 velah a thi a, Zonunmawii chu ZMCH-ah enawl zui a ni.

AR-te'n vaihlo ṭhat lohzia zirtir

Assam Rifles chuan April 9, Nilaini khan Lawngtlai district-a Myanmar ramri hnaih khua, Laitlangah vaihlo ṭhat lohzia inzirtirna an buatsaih. Inzirtirna hunah hian Laitlang khaw mi eng emaw zat an tel a, vaihlo zuk leh hmuam ṭhat lohzia leh natna a thlen dante inhrilhfiah a ni.

MLA-in tlawh

Adviser to chief minister Lalmuanpuia Punte, MLA chuan April 9, Nilaini khan a bial Hrangturzo chhunga East Lungdar Primary Health Centre a tlawh a, thawktute'n an mamawh leh harsatnate an lo thlen. Lungdar PHC-ah hian khum 10 a awm a, doctor pakhat, nurse pathum leh thawktu dang 17-in an enkawl mek a ni.

PROSPER sawiho

Khawzawl District Coor-dination Committee chu nimin khan FOCUS design team-te nen an inkâwm. Inkawmhona hi Committee chairman K Vanlalṭhiana, bawrhsapin a kaihruai a; FOCUS 2.0 chhunzawmna tur Promoting Rural Opportunities through Sustainable Production, Enterprise and Resilience (PROSPER) chungchang sawiho a ni.

General body meeting

Salvation Army India Eastern Territory chhunga officer chawl tawh fate intêlkhawmna, Retired Officers Childrens Fellowship (ROCF) chuan nimin khan Aizawl Bazar Corps fellowship hall-ah General Body Meeting an nei a, thil pawimawh chi hrang hrang an rel. ROCF hi kum 2018-ah din a ni a, member 300 vel an awm mek a ni.