PHE hotute leh Lungleia pawl aiawhte'n Lunglei khawpui châwmtu tui lakna tlawh

Public Health Engineering (PHE) engineer-in-chief Duhkima chuan April 9, Nilaini zing khan Lunglei khawpui tui lakna Pialthleng a tlawh a; fûr ruahtui tui dah khawlna neih hlutzia hriat thar a ṭul thu a sawi.

PHE E-in-C ho hian Lungleia PHE hotu te, Lunglei Sub-Headquarters YMA hruaitute leh MJA-te'n tunlaia Lunglei khawpuia tui harsatna sutkian dan tur an sawiho a ni.

Duhkima chuan, fûr ruahtui dah khawlna neih a hlutzia hriat thar a ṭul thu leh Lunglei khawpuiin kumin ṭhála tui harsatna an tawh chu sorkarin a hriat thu a sawi a, "Ṭhál khaw ro vangin tui hi litre maktaduai 10 velin a kiam tawh a, hun pangngaia ni khata darkar 24 pump ṭhin kha darkar 8-9 chauh pump theih a ni," a ti a; tuna Tlawng lui an khuah mekin thla hnih chu mipui a châwm thei tura an ngaih thu a sawi.

Lui kam ngaw vah chereu zel a pawi thu sawiin Duhkima chuan, "Sum tam tak sênga tui khuah a ngai ṭan tawh. Kumin March 10 aṭangin tui a kám ṭan tih PHE department-in a hria a, mipuite'n an dinhmun an hrethiam hi a lawmawm. Kum 2015 khan Mat tui lak (pump) dan tur cheng vbc 987.93 hu DPR kan siam chu sorkar laipuiah a tlang zo lo a, tunah hian cheng vbc 380 man potential project kan siam a, funding kan zawng mek," a ti.

YMA, Sub-Hqrs Lunglei hruaitute chuan, tui khuah mek chu lawmawm an tih thu sawiin, lei hnâwl tling khawm (siltation) nasa lutuk awm thei lakah checkdam siam theih ni se an duh thu an sawi a; lui kam (catchment area) humhalh nan YMA-in inzirtirna kalpui an inhuam thu an sawi bawk.

Lunglei District MJA-te pawhin PHE E-in-C hnenah hian lirthei liana tui sem dan ngaihtuah turin rawtna an thlen a ni.

Inkawmho zawhah E-in-C ho hian Lungleia sorkar, khawtlang leh pawl hruaitute hian fûr tui tam laia tui litre maktaduai 240 khuah tlin theihna tur, AMRUT 2.0 hnuaia cheng vbc 4 chuang senna tur hnathawh mek enho a ni.