Local level task force kaihhruaina siam

Disaster Management & Rehabilitation department chuan, Covid-19 dona leh lockdown kalpui mekah local level task force hmalak dan turah inkaihhruaina 'Standard Operating Procudure' (SOP) an siam. SOP hi India sorkarin complete lockdown a puan kalpui dan tur (guideline) a siam zúlzui leh Ministry of Health & Family Welfare leh Mizoram Health department-te'n Covid-19 chungchanga hriat tur ṭul (advisory) an chhuahte aṭanga DMR department-in an duan a ni.

LTF MAWHPHURHNA ṬHENKHAT 

 Sorkar thuchhuahte a hlawhtlin theih nan mahni huam chhung ṭheuhah hma an la ang. 

 Essential commodity leh service khaihlak loa a kal theih nan hma an la ang a, tluang taka a kal zel dan tur list sorkar siam ang zela kalpui tur a ni. 

 Mahni khua/veng chhungah Covid-19 vei rinhlelh emaw harsatna nei an awmin, thinhrik leh endawng an nih lohna turin chak takin hma an la ang. 

 Sorkarin inkhung hran (home quarantine) ngai a tih te, mahni khua/veng ṭheuhah an en zui ang a, list fel takin an vawng ang.

  Hun bituk chhungin home quarantine guidelines angin an awm em tih an thlithlai ang.

  Mipui punkhawmna huaihawt lo tur leh punkhawmnaa tel loh pawimawhzia inzirtir a, mi ina leng lo tur leh khawlaia chhuak lo turin mipuite a zirtir ang. 

 Mahni khua/vengah chhuanchham, harsatna tâwk, damlo, tar chak lo leh ṭanpui ngai an awm chuan him taka ṭanpui dan tur zawn ni se. 

 Thil zuar, a man tito emaw lei khawl duham tur an venpui ṭhin ang.

  Covid-19 vanga thi an awm chuan ruang sawngbawl dan ah sorkar thuchuak angin hmalak tur a ni a, mitthi vuinaah (lumen tiamin) mi 20 aia tam awm khawm phal lohna dan sorkarin a siam an kengkawh ang. 

INFORMATION PEK CHUNGCHANG

  Thu belhchian dâwl lo thehdarh tur vên kawngah mahni khua/vengah hma an la ang. 

 Thudik leh sorkar thupek thehdarh kawngah information centre-te hman ṭangkai.

  Information centre aṭanga thu puan dawnin, hriat nuam leh pawm nuam zawnga ṭawngkau chheh hman ni se, au zin lutuk loh ni se. 

HIMNA CHUNGCHANG 

 Duty tur chu hrisel ṭha pangngai ni thei se. 

 Kum 60 aia upate chu duty tura chhuahtir loh ni se. 

 Duty-te chu ft. 6 vela inhlata awm ni se. 

 Document enfiah duh an neihin document kuta khawih kher loa finfiah dan zawn ni se. 

 Safety gear / personal protective equipment hman leh kut silfaina ṭha tak ruahman theih ṭhin ni se. 

 Duty-te mahni ina an haw hunah fimkhur ni se. 

 Duty-naa hak thawmhnaw chu thawmhnaw dang nena inchiahpiah loa suk vat ni se.