Upate kaihhnawih thil zirho a ni

Ministry of Social Justice & Empowerment hnuaia Regional Resource Training Centre (RRTC) for Senior Citizens chuan nimin khan Bawngkawn South YMA Hall-ah upate tan 'Workshop on Elderly Issues' an buatsaih a; Aizawl veng hrang hranga MUP member 650 telin, Social Welfare minister Lalrinpuii'n a hmanpui.

Minister Lalrinpuii chuan, upate chu hnam ro hlu an nih thu a sawi a, "In thiamna leh in tawnhriatte hi ṭhangtharte hian ngaihhlut nachang kan hre ṭan tawh viau a, kan la hriat belh telh telh dawn. Mizoram sorkar pawhin kum upa zawkte hi a theihna chinah a ngaihsak a, pension pawh kan tipung a, in tana tih theih chinah chuan ṭanpui zel pawh kan inhuam a ni," a ti.

Ministry of Social Justice & Empowerment buatsaih National Review Conference-ah a tel thu sawiin Lalrinpuii chuan, "Kum upate tana day care cum recreation centre kan mamawh thu ka thlen," a ti a; district tinah old age home siam thuai a nih tur thu a sawi.

Zirhonaah hian Mission Foundation Movement executive director Lalramchuanzela'n RRTC hmalakna a tarlang a; fitness trainer K Lalbiakzuala'n upate tana taksa insawizawi pawimawhna leh cardio exercise a zirtir. Mizoram Law College assistant professor Lalremruati'n upate chanvo leh venhimna dan a zirtir a, Cyber Crime sub-inspector John Vanlalruata Sailo-in cyber crime chungchang a zirtir bawk.