Bial chhungah public interview hawng

Minister of state Prof. Lalnilawma chuan nimin khan a bial, Ṭawi constituency chhunga Thingsulthliah, Seling leh Thingsul-Tlangnuamahte mipuite'n awlsam zawka amah an dàwr theih nan public interview a hawng a; bial chhunga khawtlang hruaitu, pawl hruaitu leh mimal eng emaw zatin hmuin, an mamawhte an thlen.

Prof. Lalnilawma chuan, MLA atan thlan tlin a nih chuan a bial mipuite nen awlsam zawka an indawr theih nan a bialah hun a hman ṭhin tur thu a lo sawi tawh chu a takin a bawhzui tih a sawi a, "Pathian, party leh chief minister Pu Lalduhoma duhsakna dawngin minister hial ka lo nih ve tak avangin official work a lo tam a, duh anga zingin bial chhunga hun hman a har hle mai a, a remchan dan ang zelin khaw hrang hrangah a tahtawlin mipui dawr theih turin ṭhut zel ka tum," a ti.

ZPM kaihhruai sorkarin theihtawpin Mizoram hmasawn nan a thawk nia sawiin Lalnilawma chuan, "Chief Minister leh minister dang zawng zawng hian theihtawp tak meuh an chhuah a, mipui pawh sorkar hmalaknate thláwp zel turin ka sawm," a ti a; sorkar hmalaknaah duhkhawp lohna a awm pawhin, sawisel lama ramṭang mai lo a, minister-te leh sorkar official-te finchhuaha thurâwn pe fo turin mipui a ngen a ni.