Kutkawih eizawnna chungchang sawiho

Mizoram CSR Cell chairman TBC Lalvenchhunga, MLA chu April 9, Nilaini tlai khan Mizoram startup leh entrepreneur-te zir chiang tura lo kal Indian Institute of Management, Bangalore-a NS Raghavan Centre for Entrepreneurial Learning (NSRCEL) hotute nen Planning committee room-ah an inkâwm.

TBC Lalvenchhunga chuan, Mizoram CSR Cell anga Bangalore-a an zinna chuan rah ṭha a chhuah tih sawiin, "Startup ecosystem zirchianna in rawn nei hi a hlu hle. Mizoram sorkar chuan entrepreneurship leh startup chawikan nan Handholding scheme a duang a, venture capital fund a siam a, ṭhalai tam takin an chhawr dawn," a ti a; NSECEL leh Mizoram sorkar ten thawhhona ṭha nei zel se a duh thu a sawi.

NSRCEL hotute chuan, Mizoram chu an rin aiin kutkawih eizawnna lamah hma a sawn thu an sawi a; hmasawn zelna tur nia an hmuhte sawiin, Mizote chu theihna ṭha tak an nei nia an hriat thu an sawi a ni.

NSRCEL hi IIM, Bangalore hnuaia startup incubation centre niin, Mizoram Startup Mission-in an lo dawngsawng a; Commerce & Industries department, MZU Incubation Centre, TILI leh entrepreneur hrang hrangte an tlawh a ni.