Tuichangral Championship khârna hmanpui

Minister Lalthansanga, MLA pahnih - Lalmuanpuia Punte leh Jeje Lalpekhlua te chuan April 9, Nilaini khan East Lungdar Mini Sport Complex-ah Tuichangral Championship 2025 khârna hun hman an hmanpui.

Lalthansanga chuan, infiamna chu taksa leh rilru hriselna atan a pawimawh thu sawiin, "Tunlai ṭhangthar zawkte'n a hlutna leh pawimawhna hriaa kan uar chho zel hi a lawmawm. Kum upa lamte pawhin kan theih ang angin taksa kan sawizawi a pawimawh a, ei leh in thlengin kan uluk a ngai," a ti.

Ṭhalai tam tak ruihhloin a tibuai tih sawiin Lalthansanga chuan, "Nasa takin kan ramah nghawng ṭha lo a thlen. Ruihhlo laka kan fihlim theih nan infiamna kan uar deuh deuh a pawimawh a, ruihlo laka kan ṭhalaite an fihlim theihna tura hmanraw pawimawh tak a ni," a ti a; sorkarin Universal Health Care Scheme a siam chhhawr ṭangkaitu nih tum tur leh sorkar hmalaknate thláwp tlat turin Tuichangral mipui a chah.

Championship khârna inkhawmah hian bialtu MLA Lalmuanpuia Punte leh South Tuipui bialtu MLA Jeje Lalpekhlua te pawhin thu an sawi.

Tuichangral Championship hi March 30 khan ṭan a ni a, khaw 33 aṭangin infiammite infiamna chi hrang hrangah an intihsiak a ni.