Lungleiah LEAP kalpui dan tur sawiho

Lunglei bawrhsap Naveen Mann hoin April 9, Nilaini khan Lunglei district-a vohbik, person with disabilities (PwD)-te chàwikànna tura hmalakna, Project Lunglei’s Empowerment for Access and Equity for all Persons (LEAP) kalpui dan tur sawiho a ni a; April 22-26, 2025 chhungin Lunglei Municipal Council huam chhunga PwD-te tan health camp buatsaih a ni dawn.

Navneet Mann chuan, Project LEAP kalpuina turin Lunglei district-a vohbik survey neih tawh a nih thu a sawi a, "LMC leh RD block hrang hrangah doctor-te leh thawktute'n kal chilhin, vohbikte tan hriselna dinhmun endikna (health assessment camp) buatsaih tum a ni a, Unique Disability ID (UDID) card la nei lote hnenah sem tum a ni," a ti.

Meeting-a tarlan danin, April 22-26, 2025 chhungin LMC huam chhunga PwD-te tan health camp buatsaih a ni dawn a, Lunglei Civil Hospital hotute kutah mawhphurhna dah a ni. RD block hrang hranga health camp buatsaih tur ruahmanna chu BDO-te kutah dah a ni thung.

Ṭhutkhawmah hian, health camp buatsaih tur chu mipui hriatah zau taka puanzar leh, veng chhunga vohbikte'n health camp an pan theih nana buaipui turin local council-te ngen an rel a; camp buatsaih turah hian Artificial Limbs Manufacturing Corporation of India-te tel tura ngen ni se, an ti.

Lunglei district-ah khaw hmuh lama harsatna nei (visually challenged students with 40% benchmark disability) zirlai 10 hnenah smart tablet sem tura ruahman a ni bawk.