Covid-19 vei a ngaihtuah awm loh A chhungte leh mi dangin an kai ve lo
Health minister Dr R Lalthangliana chuan, Mizorama Covid-19 vei mek chu a ngaihtuah awm loh thu sawiin, "A nupui fanau leh sample dang thawnte chu result a negative vek a ni," a ti.
Health Minister hian nimin khan thuchah tichhuakin, Covid-19 vei Zoram Medical College (ZMC)-a enkawl mek chu ngaihtuahawm a nih loh thu a sawi a, a nupui fanaute leh mi dang, sample 10 an thawn chu Covid-19 kai an awm loh thu a sawi. Dr R Lalthangliana chuan, Covid-19 donaah medical lama thawkte chu rál hmatáwngah an ding tih sawiin, "Health care worker-te chu - doctor, nurse, paramedical worker, driver, group D leh thawktu dangte an ni," a ti.
Health Minister chuan, Covid-19 kai enkawltute fakin, "Enkawl tura inpe medical team-te kan chhuang. A bik takin Covid-19 case hmasa ber enkawl tur team doctorte leh nurse-te leh anmahni puitute inpekna Mizoramin a theihnghilh tawh lo ang," a ti a; medical team-te tan mi tam tak an ṭawngṭai thu a sawi. Damdawi-ina thawkte rilru leh taksa nasa takin an inbuatsaih tih a hriat thu sawiin Minister chuan, "Kohhran leh private hospital-a thawkte pawh an inpekna avangin lawmawm ka ti tak zet. In invenna tur inthuamnate pawh sorkarin a ngaihtuah zel dawn a ni," a ti.
Dr R Lalthangliana chuan, "Hlauh loh tur hlau ta chiamte awm theih a ni a, phílí lo leh rálkhel loin, kan duty ṭheuh mipuite'n kan hlen a ṭul. Covid-19 vei pakhat dah a nih vanga ZMC leh ZMC-a thawkte ṭih ta maite pawh an awma sawi a ni," tiin mipuite rilru fîm pu turin a chah. Covid-19 chu theihtawpa an beih zel dawn thu sawiin Health Minister chuan, "Kan fimkhur ang a, chî-âi leh hlauthawng lutuk, mi dangte thinhrik khawp chuan i awm lo ang u," a ti a; theihtawpa ṭan latu local task force, kohhran leh YMA-te chungah lawmthu a sawi a ni.
HEALTHCARE WORKER TANA SORKAR RUAHMANTE
• An taksa hriselna atana chaw ṭha leh an mamawh pek
• An chhungte hriselna leh himna ngaihtuahsak
• Covid-19 emaw, a kaihhnawih natnain a tlakbuak a nih chuan free medical treatment pek
• Covid-19 vanga thi an awm chuan zangnadawmna ṭha tak pek
• Healthcare worker-te sorkarin a ngaihlu a ni tih hriat nan sorkarin theihtawp a chhuah
• Healthcare worker-te welfare a ṭul anga ngaihtuah chhunzawm