Ruihhlo tawlh rutute an chêp sâwt hle - ZPM Ṭhalai

ZPM Ṭhalai chuan thuchhuah siamin, ZPM party kaihhruai sorkarah Police leh Excise & Narcotics mi leh sate kut phuarsak an nih ve loh avang leh dan loa thil tawlh rutute lakah mit an siai ve loh avangin ruihhlo tawlh rutute an chêp sâwt hle niin an tarlang.

ZPM Ṭhalai chuan, Police leh Excise-te kut phuar a ni tawh lo chu lawmawm an tih thu sawiin, "ZPM a sorkar hnuah kan Police leh Excise ten dan loa bungraw tawlhrûk, damdawi leh dan phal loh ṭhahnem tak man a ni tawh a, sorkar hmasa lama dan phal loh tawlh ru ṭhinte pawh an chêp sâwt hle a ni," an ti.

Tun hnaia heroin (no.4) hawng 440 man a nih chungchangah ZPM ṭhalaite chuan, "Hremna na thei ang ber pe ngei turin kan sorkar hi kan beisei," an ti a; hlâwkna duh vanga Mizo ṭhalaite thisen hmanga eizawngtu Mizo an awm chu pawi an tih thu an sawi.

ZPM Ṭhalai chuan, "Excise & Narcotics changtu minister Pu Lalnghinglova Hmar leh a thawhpuite'n chak taka hma an lakna a zarah ruihhlo tawlh rutute man chhuah an ni mek zel hian sorkar langtlang leh chak tak, smuggler-te laka mit siai ve lo leh sorkar hnathawkte kut phuar an nih lohzia a tichiang hleah kan ngai," an ti a; ruihhlo chu Mizo hnam suat mektu a nih avangin ruihhlo hmanga eizawngte chu bànsan tawh turin an ngen bawk.