Khualzin hîp turin ruhrel siam belh ringawt a tâwk dawn lo - Tourism Minister

Tourism minister Lalnghinglova Hmar chuan nimin khan Tourism directorate a tlawh a, thawktute nen inkâwmin, khualzin hîp turin ruhrel (infrastructure) siam belh ringawt a tâwk dawn loh thu a sawi.

Lalnghinglova Hmar chuan, Mizoramin tourism lamah theihna a nei ṭha tih a nih thu sawiin, "Ṭhenawm state-te neih loh eng nge kan neih? Tlang, ruam leh lui inang kan nei a, hei vang tak hian ṭhenawm state aia tlawh châkawm turin Mizoram kan chei a, kan pho chhuah a ngai. Chumi tur chuan kawng tinrêngah kan ṭan a ngai a, infrastructure siam belh ringawt a tawk dawn lo," a ti.

Tourism department official-te nen thawhhona ṭha tak an neih a beisei thu leh phûrawm a tih thu sawiin Minister chuan, "Tourism hmasawnna chu building sak leh chei ṭhat mai piah lamah, tourist an pun leh pun loh aṭangin a lang chiang dawn a, kum hmasa aiin Mizoram tlawhtu tourist ngah kan tum tur a ni," a ti a; Tourism department hlawhtlinna chu khualzin zat aṭanga teh tur a nih thu a sawi.

Lalnghinglova Hmar chuan, Mizoramah khualzinte rei zawk an chàm theih nan tourism package mumal tak neih a ngaih thu a sawi a, "Aizawl khawpui hi India ram state khawpui dangte ang lo takin hmun khat aṭanga lang zau thei, khaw thlirna mawi em em nei a ni a, hei hi kan pho chhuah thiam a ngai. Mizorama hmun mawi bikte kan chei rualin, khawpui chu khualzin tlawh hmasak a nih ṭhin avangin chei a ṭul a, mipui pawh khualzin dawngsawng tura an inpeih a ngai," a ti.

Tourism Minister chuan, khualzinte tan thlenna hmun him leh rintlak zawk nei turin homestay awm mekte dan hnuaia enkawl (regulate) a, inkaihhruaina mumal zawka kalpui a ṭul thu a sawi a; Mizote’n Krismas kan lawm dan chu khawvel danga awm ve lo a nih avangin state leh ram pawn lam mite pawhin chhim ve an châk tura pho chhuah theih a nih a rin thu a sawi bawk.