World Homoeopathy Day hmang

AYUSH Directorate chuan nimin khan Dawrpui Multipurpose Hall-ah World Homoeopathy Day an hmang a, Governor Gen. Vijay Kumar Singh leh Health & Family Welfare minister Lalrinpuii ten an hmanpui.

Governor chuan, homoeopathy chu khawvela ram zingah India ramin a uar ber thu sawiin, "Natna enkawlna atana him leh tláwm a nih avangin chawi lar a pawimawh," a ti a; homoeopathy chawi lar kawngah hma la zel turin zirna-in leh sorkar thuneitute a chah bakah, zirbingna (research) lamah ṭan la tur leh homoeopathy tihhmasawn tum turin homoeopathy doctor leh zirlaite a fuih.

HFW minister Lalrinpuii chuan, Mizoramah AYUSH doctor-te hnathawh fakawm a tih thu sawiin, "National health programme hrang hrang kenkawhnaah AYUSH doctor-te hi Health department kutke pawimawh leh ṭangkai ber ber an ni a, indaih lohna leh mamawhte pawh sorkarin a ṭul angin a buaipui zel dawn," a ti a; post graduate degree neite chu clinic hawnga an thiamnate mipui tan hmang turin a chah.

Kumina World Homoeopathy Day thupui chu, 'Adhyayan, adhyaapan, anusandhaan' (Zirna, zirtirna, zirchianna) tih a ni a; Day hmannaah hian Health secretary H Lalengmawia, principal director Dr Lalthlengliani leh mi pawimawh dangte pawhin thu an sawi.

Mizoramah homoeopathy doctor 280 vel an awm mek a, chu'ng zinga pasarih chuan PG degree nei an ni.