CSS hnuaia thawkte'n ni 3 chhung sorkara lungawi lohna an lantir dawn

All Mizoram CSS Employees Coordination Committee (AMCECC) chuan Mizoram sorkar laka lungawi lohna ni thum chhung an lantir dawn a; CSS hnuaia thawk zawng zawngte chuan hna an thawhna hmun ṭheuha kal siin hna an thawk dawn lo.

AMCECC hian sorkar laka lungawi lohna lantir nan April 15-17, 2025 chhung pen/tool down strike neih an rêl a, "Mizoram sorkar hnuaia CSS employee-te'n lungawi lohna kan lantir vanga harsatna mipuite'n kan tâwk a nih pawhin mipuite hriatthiamna kan ngen nghal a ni," an ti.

Sorkarin ‘Govt. of Mizoram Regularisation of CSS Employees Scheme, 2024’ a siamsak avanga an lawm thu tarlangin AMCECC chuan, "A hlawhtlinna nghakhlel taka kan thlir mek laiin, DPAR aṭanga office memorandum chhuaka checklist chuan harsatna nasa tak min siamsak," an ti a, department ṭhenkhat rawtna leh ruahmanna an hnâwl zel niin an tarlang.

AMCECC chuan, an harsatna a rang thei ang bera ngaihtuahsak tura sorkar phûtin, "Pen/tool down strike hian awmzia a neih loh chuan kan kal zel dan tur ngaihtuah leh a ni ang. Kan hmalakna avanga CSS employee-te zinga mi tu pawh harsatna tâwk an awm a nih chuan AMCECC-in a ṭul angin hma na takin a la zel ang," an ti.