Aizawla Bru zirlaite'n Boisu an hmang; Bru House cum Hostel sak a ni dawn - CM

Bru Student Association (BSA) chuan April 12, Inrinni khan Vanapa Hall-ah Bru kum thar kût, Boisu an hmang a, chief minister Lalduhoma'n a hmanpui. CM chuan, Tanhrilah Bru House cum Hostel sak thuai a nih dawn thu leh a sakna tur sum a awm tawh thu a sawi.

CM Lalduhoma chuan, BSA hruaitute'n amah an hmuh apianga an sawi ṭhin Bru House cum Hostel chu sak thuai a nih dawn thu a sawi a, "Hun rei tak aṭanga in lo beisei tawh Bru House cum Hostel hi Tanhrilah kan sa dawn a, sum pawh a awm tawh. Rei lo têah hna ṭan thuai kan tum," a ti.

Mizoramah hnam pêng hrang hrang an awm thu sawiin Lalduhoma chuan, "Inngeih leh lungrual taka kan khawsaho ṭhin hian kan ram a timawi a, a tinuam. Kum tam tak chhung chu India rama state ralmuang berah kan inchhál tawh. India ramah mahni hnam zia leh tih dan ṭhate chawi nung turin zalenna kan nei a, mahni hnam zia chawi lâr duh luat vanga hnam dangte tih dan ngaihtheih loh hi thil dik a ni lo," a ti a, awm dan chin tâwk thiam tlân a ngaih thu a sawi.

Chief Minister chuan, hnam anga inhnuai­chhiahna leh sakhua zawnga inbeihnate a awm thiang lo tih sawiin, "Ralthuam leka inlakna hran tumna lam phei chu a awm kan remti lo bur. Mizoramin chak taka hma a sawn chhan hi remna leh muanna kan neih vang a ni a, tihchhiat kan phal lo. Mizoram mi kan nih chuan Mizoram ṭhatna tur hi kan ngaihtuah reng ṭhin tur a ni," a ti.

Boisu hmannaah hian BSA president Lalromawia Apeto leh Bru Welfare Union of India president Biakṭhuama Molshoy te pawhin thu an sawi a; BSA Shillong Cultural Troupe, BSA Aizawl Branch, Bodo Students Union (MZU) ten hnam lâm an entir a ni.