Thlai/thei sawngbawlah state/UT zingah Mizoram a hniam ber dawttu

India rama kut hnathawktute thlai thar thawn chhuak tura sawngbawlna lama hmasawnna tehfung hnuhnung ber, NITI Ayog Export Preparedness Index, 2022-ah Mizoram chu India rama state leh union territory zingah a hniam ber dawttu a ni.

Aizawl DC office leh Agricultural and Processed Food Products Export Development Authority (APEDA) chuan tun hnai khan DC conference hall-ah state pawna thlai thar hralh chhuahna lama hmaṭhatna awmte inzirtirna an buatsaih a; Aizawl DC Lalhriatpuia chuan, NITI Ayog Export Preparedness Index 2022-ah Mizoram chu India rama state leh UT 36 zingah a hniam bwer dawttu, 35-na a nih thu a sawi.

Bawrhsap Lalhriatpuia chuan, department hrang hranga thawk te, kutkawih sumdawnna lam buaopuitu te, farmers producers organisation (FPO)-te leh pawl hrang hrangte thawhho ṭhat a pawimawh thu a sawi a, "NITI Ayog Export Preparedness Index, 2022-ah Mizoram hian kan thei leh thlai tharte leh heng aṭanga siam thil chi hrang hrangte hralh kawngah nasa taka hmalak a ṭulzia a lantir a ni," a ti.

Capacity Building on the Role of APEDA in Export Promotion of Agricultural and Horticultural Products, Financial Assistance Schemes of APEDA-ah hian Horticulture department-a thawk te, Mizoram State Rural Livelihood Mission, FPO-te leh entrepeneur-te an tel a; Tripura APEDA business development manager Joydev Roy-a'n thil pawimawhte a zirtir a ni.