KHAWTHLIR

MUHCS-ah MLA-te'n pawisa thawh dawn

Mizoram Legislative Assembly hnuaia General Purposes Committee (GPC) chu April 11, 2025 khan an ṭhukhawm a; an hlawh aṭangin Mizoram Universal Health Care Scheme-ah pawisa thawh ṭha an ti a, MLA pakhatin thla tin Rs 1,500 zel thawh ni se, an ti. GPC-ah hian BJP, INC, MNF leh ZPM aṭangin MLA 17 an tel a ni.

Technical team din

Aizawl District Disaster Management Authority chairman Lalhriatpuia, bawrhsap kaihhruaiin April 12, 2025 khan Ngaizel kawng pheia lung tla vanga chhiatna thleng ṭhin chungchangah emergency meeting neih a ni a; Geology & Mining, DMR, PWD, AMC leh Traffic hotute an tel. Kawng hrang hranga hmalakna tur an ruahman a, zir chiang tur technical team an din nghal a ni.

Zebra crossing siam turin ti

Serchhip district-a National Highway (NH)-02 zauh leh tihchangtlun hna thawh mek chungchangah tun hnai khan bawrhsap Paul L Khuma leh sorkar hotu te, NHIDCL aiawhte leh contractor-te an ṭhukhawm a, harsatna chinfel dan turte an sawiho. Contractor-te chu khawpui chhung cheimawina ni pahin hmun thumah mipui kawng kânna (zebra crossing) siam tura tih an ni.

Vawk lak luh khap

Lawngtlai district magistrate Cheemala Siva Gopal Reddy chuan thupek chhuahin, tun hnaia Mizoram hmun hrang hranga vawk pùl hri (ASF) leng vangin Lawngtlai district-ah district pawn aṭanga vawk lak luh khap tlat a nih thu a puang. Vety aṭanga vawk hrisel hriatpuina certificate neite chauh talh phal a nih thu leh, thupek zâwm lote chu dan anga hrem theih an nih thu a tarlang bawk.

Ui lak luh khap

Hnahthial district magistrate K Vanlalruati chuan thupek chhuahin, ui a hri (rabies) lêng laka him nan Hnahthial district-ah Manipur aṭangin ui lak luh khap a nih thu a puang. Ui vulhtute chu Vety office-ah an ui vulhte hri danna laktir vek tur te, khawlaiah hrui nen kai loa ui chhuahpui lo tur te, ui zun leh êk hnutchhiah lo turtein a hriattir.