Aizawl Ven Bûk (ICCC) hmangin lirthei tihbo thubuai 600 vel chinfel a ni tawh

Chief minister Lalduhoma leh Home minister K Sapdanga chuan April 11, 2025 khan Treasury Square-a Aizawl Vên Bûk, Integrated Command & Control Centre (ICCC) an tlawh a; ICCC kaltlang hian lirthei tihbo thubuai 600 vel chinfel a nih tawh thu tarlan a ni.

Chief Minister leh Home Minister hi Aizawl Smart City Ltd chief executive officer CC Lalchhuangkima leh thawktu dangte'n ICCC hnathawh dan leh ṭangkainate a hrilhfiah. Aizawl khawpuia CCTV ṭhahnem tak an dah hmangin lirthei tlan kualna thlengin hriat theih a ni a, automatic number plate recognition system hmangin lirthei bo thubuai 600 vel chinfel a ni tawh tih an tarlang.

CM Lalduhoma chuan, Aizawl hmunhma lûn zual lai tuam vek thei CCTV network, record fiah leh changkang tak a awm chu lawmawm a tih thu sawiin, "A enkawlna lam hautak deuh mah se, ram leh khawtlang venhimna atan a ṭangkai a, duhthusamah chuan Aizawl chhung leh a chhehvel hnaivai, chhiatna thlen palh theihna hmunte huam thei ila a tangkai zual ang," a ti a; ICCC chu ṭangkai lehzuala hman a nih theih nan thawhhona ṭha a pawimawh thu sawiin, theihtawp chhuah zel turin thawktute a chah.

K Sapdanga pawhin thu sawiin, ICCC zarah misual, rûkru leh dâwt sawi ching thlengin chhui chhuah an nih tawh thu a sawi a, "Tun hnaia mi pakhatin, 'Raltlan, silai kengte'n kut min thlak' a tih pawh kha thil dik tak chu he hmun aṭang hian chhui chhuah a ni," a ti.

ICCC hi cheng vbc 87.18 senga din a ni a, April 1, 2023 khan Union Home minister Amit Shah-a'n a hawng. A enkawl nan thla tin Rs 8,70,000 vel mamawh a ni a; mimal anga hmang ṭangkai duh tan Rs 100 chawia hman theih a ni.