Siaha dist-a ASF vanga tawrhnaah hma la thuai turin MLA-in sorkar ngen

Siaha bialtu MLA Dr K Beichhua chuan April 12, Inrinni khan Siaha AH&Vety Farm-a vawk pùl hri, African Swine Fever (ASF) vanga vawk thite phûmna hmun a tlawh a; Siaha district-in ASF vanga a tawrhnaah hma laksak thuai turin Mizoram sorkar a ngen.

Dr K Beichhua chuan, April 12 zing thleng khan Siaha district-ah ASF vanga vawk thi leh suat 912 a awm tawh thu a sawi a, "Tun hun thleng hian state sorkar aṭangin Siaha District Veterinary Officer hnenah Rs 50,000 pek tawh a ni a, a lawmawm em em rualin, hei ringawt hi chuan ASF darh mek buaipui a har dawn. Kan tawrhnate min ngawihbopui mai loa chak taka hma la turin Mizoram sorkar ka phût tlat a ni,” a ti.

Sorkar term hmasa lam aṭang tawhin ASF vangin vawk eng emaw zat a thih tawh thu sawiin K Beichhua chuan, "Mizoram sorkarin sorkar laipuiah nasa taka a nawrna zarah vawk vulhtute hnenah zangnadawmna pek a ni a, amaherawhchu, vawk suat loha thite chu state-in disaster-a a puan theih loh avangin compensation pek theih a ni lo," a ti a; tunah Mizoram sorkarin disaster-ah a puan tawh avangin Siaha district-a ASF tuartute chu Disaster Management & Rehabilitation aṭangin zangnadawmna pek theih a nih tawh thu a sawi.

Dr K Beichhia chuan, ASF vanga Siaha district-a vawk thi neitute hnenah zangnadawmna pek thâwm hriat a la nih loh thu a sawi a; sorkarin tun aia chak zawkin hma la se a duh thu leh, vawk thi sawngbawlna leh phûmnaah AH&Vety department-in sum leh pai phal deuh se a duh thu a sawi bawk.

Siaha bialtu MLA hi Siahaa AH&Vety department leh MADC hotu te, Siaha Joint VC leh mi pawimawh dangte'n an ṭawiawm a ni.