MLA-in kawng siam mek a enfiah

Aizawl West-I bialtu MLA TBC Lalvenchhunga, adviser to CM chuan April 12, Inrinni khan a bial chhunga Ramrikawn aṭanga Sakawrtuichhun kaltlanga NH-54 kawngpui pawhtu kawng siam mek a enfiah.

TBC Lalvenchhunga chuan, kawng siam mekah hmun ṭhenkhatah a khi leh hmun hnihah siamṭhat ngai a awm thu sawiin, "Mi ṭhenkhatin thuneitute hnena thlen mai loa social media hmanga insawichhiatna atana an hmang hi a zialo hle. Hmun tlemte kawng siam zawh tawh khîk vanga hetia kawng chhe ta vek anga social media-a thehdarha mipui rilru hruai pên tum hi intihhmingchhiat tumna hrim hrim a ang," a ti.

Aizawl West-I Bialtu MLA sawi danin, kawng siamna atana mix design-ah hian 1:1.12:2.03 cement proportion hman a ni a, cement ip khatah balu ṭín hnih leh rawra ṭin thum hman ṭhin a ni. Cement chu tualchhunga mi hmang loin ordinary portland cement (OPC) hman a ni a, kawng chu tlo leh ṭha tak tura siam a ni.

TBC Lalvenchhunga hi PWD superintending engineer Lalringheta leh Sakawrtuichhun khawtlang hruaitute'n an ṭawiawm.

Kawng hi December 2024 aṭangin plain cement concrete (PCC)-a chhûn a ni a, 60% chhûn zawh a ni tawh. May 2025-a siam zawh tura ruahman a ni a, km. 3 leh a chanve a thui PCC hmanga siam tur a ni.