National Tribal Youth Festival-ah Naupang Pual Kût buatsaih a ni

April 9-11, 2025 chhunga State Tribal Resource & Training Centre-a National Tribal Youth Festival hmanah April 11 khan naupangte pualin 'Naupang Pual Kût' buatsaih a ni a, sikul eng emaw zat aṭangin naupang ṭhahnem tak an tel.

National Tribal Youth Festival tawp nía Naupang Pual Kût hi Social Welfare & Tribal Affairs director Dr Lalhriatzuali Ralte-in a kaihruai a, secretary Lalzarmawii khuallian a ni a, Mizoram State Commision for Protection of Child Rights chairman Jimmy Laltlanmawia'n a hmanpui bawk.

Lalzarmawii chuan, naupangte kaihhruainaah leh humhimnaah mi tinte'n hma thar an lak a ṭul thu a sawi a; Jimmy Laltlanmawi'n naupangte chanvo leh danin naupangte a humhalh dante sawifiahin, naupangte chu ruihhlo leh a kaihhnawih thilah fihlim turin a fuih.

Naupang Pual Kûtah hian Aizawl khawpui chhung leh pawna sikul 30, Aizawla child care institution 15 leh college hrang hrang aṭangin zirlai ṭhahnem tak an tel.

Naupangte tan Mizo thawnthu leh nunphung behchhanin Zo Kawsplei (coasplay) inelna buatsaih niin, primary school, middle school leh open category-ahte ṭhen a ni a; Mizo infiamna hrang hrang hmangin intihsiak buatsaih a ni bawk.