Lungleiah tui a harsa zui zel; PHE-in lirtheiin tui an sem

Lunglei khawpui chawmna atana PHE department-in tui an lakna ber Tlawng lui Pialthleng aṭanga tui pump-in mipui mamawh a la phuhru zo lo a, Lungleiah tui harsatnain zual lam a pan zel avangin PHE department chuan lirthei hmangin tui an sem.

Thu dawn danin, Lungleia PHE department hotute chuan Tlawng lui tui nghah khawl a ngaih thu sawiin, mipui hriatthiamna an ngen. PHE hian tunlai hian Truck Owner Association (TOA) nen ruahmanna siamin, truck 10 hmangin veng ṭhenkhat leh tui harsat zualnaah tui an sem mek.

Tui semah hian chhungkaw pakhat tan bucket ruk zela pek a ni a, ruahman lâwk ang chuan lirthei hmanga tui sem hi April 18, 2025 thleng kalpui a ni dawn.

Hetih lai hian, Lungleia MLA leh Lunglei Municipal Council (LMC)-a councillor-te pawhin tui leiin, an bial leh ward chhungah a theih ang angin mipui hnenah tui an sem mek zel bawk.

Lunglei tui lakna Pialthleng aṭangin tun dinhmunah darkar 10 vel tui pump theih a ni a, Tlawng lui tui nghah khawl a ngaih avangin tui an sem khât hle a ni.