Fire Service Day/Martyrs' Day hmang

Nimin kha Fire Service Day leh Martyrs' Day a ni a; Aizawl leh district hrang hrangah hman niin, India rama kâng ṭhelh pawl zinga kâng ṭhelhna vanga thite sùnna hun hman a ni.

Fire Service Day leh Martyrs Day hi Aizawlah chuan Fire & Emergency Services Headquarters, Hunthar Vengah zing dar 7 khan hman a ni a, Aizawl pawn lama fire station-te chuan zing dar 9-ah an hmun ṭheuhah an hmang. Martar-te sùnna hunah hian kâng ṭhelhna leh duty kaihhnawiha thite sûn nan minute khat ngawi rengin an ding a, martar thlanah pangpar an dah bawk.

Kum tin April 14-20 chhungin Fire Service Week hman ṭhin a ni a, kumina thupui chu 'Unite to ignite, a fire safe India' (Kângmei lakah kan ram a him nan i ṭangrual ang u) tih a ni.

Fire Service Week-ah hian fire station tinte'n hospital/nursing home pakhat leh sikul pakhat zelah kângmei a chhuah palha him leh him loh an endik dawn a; station zawng zawngin an awmna hnaivaia sikul hotute nena ruahmannain Fire Safety Lecture & Mock Drill an buatsaih ang.

Kumina Fire Service Week pual hian Mizoram Fire & Emergency Services-a thawk mi panga chu an thawh ṭhat avangin sorkar laipuiin chawimawina, Bronze Disc leh Commendation Certificate dawng turin a thlang a ni.

April 14, 1944 khan indo lawng lian Fort Stikine, ralthuam leh bomb tam tak phur chu Bombay (Mumbai) lawng chawlhhmunah a kâng a, lawng kâng ṭhelhnaah Bombay Fire Brigade mi 66 leh Bombay Salvage Corps mi 11 an thi. Mi 77 thite hriatrengna atan India sorkar chuan April 14 chu Fire Service Day-ah a puang a, April 14-20 chu Fire Service Week atan hman zui a ni.