Sorkar hmasate kut lo thlak tawh chhunzawm kan tum dawn - Sapdanga

Aizawl North-III bialtu MLA K Sapdanga, minister chuan a bial chhung Chanmari leh Chanmari West inrìna Ramlai Road-a sorkar hmasate kut lo thlak tawhna chu chhunzawm an tum dawn thu a sawi.

K Sapdanga hian Ramlai Road chu lirthei luh theihna turin bialtu MLA hlui C Lalmuanpuia hmalaknain bul an ṭan tawh a nih thu a sawi a, "Helai hmuna chengte'n khawsak awlsam zawk an neih theihna turin sorkar hmasate kut lo thlak tawh chhunzawm turin tih theih kan neih ang ang tih ve kan tum dawn. Mimal ram sut tur tam tak a awm dawn avangin Ramlai Welfare-te'n hma an lo la hi a lawmawm," a ti.

Lirthei kal theiha siam turin tih tur tam tak a awm thu sawiin Sapdanga chuan, "Helaia chengte leh sorkar pawh inlungrual taka an thawhho a ngai dawn. Tunah pawisa hmin sa la awm lo mah se, UDPA department pawhin a theih ang angin an bawhzui zel ang," a ti a; Ramlai Road-a chengte'n harsatna kum tam tak an lo neih tawh chu sutkian theih ngei an tum thu a sawi.

K Sapdanga chuan, kawng a tlang theihna tura mahni ram phal taka petu an awm avangin an lawm tak zet tih sawiin, "Ram petute tan pawh sorkar lamin zangandawmna ang ni chiah loin, an in zâwn ṭha taka an thawh theih dan tur ruahmanna siam ni se, AMC Corporator pahnih leh veng pahnih local council pawhin an theihna zawnah hma an lak zel ka beisei," a ti.

Aizawl North-III Bialtu MLA hi corporator pahnih Rosiamngheta leh H Lalremtluanga, UDPA director Jacob Lalawmpuia, veng pahnih LC leh Ramlai Welfare hruaitute'n an ṭawiawm a ni.