Zirtirna tihhmasawn dan tur sawiho

Mizoram sorkarin Education consultant atana a ruat Rev. Dr K Thanzauva chuan nimin khan Hnahthial a tlawh a, Horeb conference hall-ah Hnahthiala zirna-in hrang hranga principal, headmaster leh zirtirtute classroom-a zirtirna tihhmasawn dan tur a sawipui.

Rev. Dr K Thanzauva chuan, zirna siamṭha turin sorkar laipuiin nasa taka hma a lak thu leh kum 14 hnuai lam tan free & compulsary education kalpui mek a nih thu a sawi a, "Hnahthialah primary school panga ka tlawh tawh zingah pakhat deuh chiah luah tlak a awm. Kan in leh lo te, kan biak-inte a zahpui awm loh em em laiin kan elementary school-te erawh a chhe em em mai hi a dik lo," a ti.

Zirna in ṭha loah sorkar chu mawhphurtu ber ni mah se, kohhran leh kawtlangte pawhin zirna in tichangtlung turin hma an lak a pawimawh thu sawiin K Thanzauva chuan, "Biak-inah te, YMA-ahte theihtawp chhuahin kan khawtlang siamṭhat tum ṭhin mah ila, kan zirna kalphung a ṭhat si loh chuan kan hlawhchham zel ang. Kan ram siamṭhat nan a bul berah zina kan siamṭhat a ṭul," a ti a; hmanrua leh bungruate vawi leh khatah tihchangtlun nghal vek theih ni lo mah se, classroom-a zirlaite zirtir dan chu tihhmasawn theih a nih thu a sawi.

Meeting on Improvement of Classroom Teaching (Promotion of Lesson Plan) hi Hnahthial district education officer H Sangthanga'n a kaihruai a ni.