Kolasib MJA-in kawng siam an enfiah

MJA, Kolasib District member-te chuan nimin khan Kawnpui leh Lungdai inkar NH kawngpui siam ṭhat mek an enfiah a, hnathawktute an chawlh avangin hmuh tur an awm lo.

Kolasib MJA-te hian Kawnpui-Lungdai inkar kawng siam chu a muang lutuka an hriat avang leh mipuiin harsatna an tawh nasat avangin kawng siam en an tum a, an kal tur thu hnathawktute hrilh lâwk mah se, thawktu hmuh tur an awm lo. Hna thawka chhawr mi pakhat chuan khawl a chhiat avanga châwl an nih thu a lo hrilh.

MJA member-te hian Serkhan VC hotute kâwmin, kawng siam dan an zawt a; VC hotute chuan kawng siamtute'n hna an thawk chak lo a, hna thawh loh ṭum an neih tam thu leh ni khatah metre 490 vel chauh an siam hman thu an lo hrilh a ni.

Kawng hi Border Roads Organisation enkawl a ni a, tuna thawm ṭhat hna thawktu chu BRN Pvt. Ltd niin, Sihphir leh Kawnpui inkar, km. 30-a thui an siam dawn. October 2025 chhunga siam zawh tur a ni a, tun dinhmunah kawng zatve vel chauh an la siam avangin hun tiam chhunga an siam zawh hman an beisei loh thu MJA member-te chuan an sawi.