KHAWTHLIR

KTP-te'n thisen pe

Evangelical Church of Maraland (ECM) hnuaia Kristian Thyutlia Py (KTP) Headquarters ruahman angin Laki leh Vahia khuaa KTP branch pangate chuan April 12, Inrinni khan Laki VC-1 House-ah Siaha District Hospital tan thisen unit 28 an pe a, petute mipa 27 leh hmeichhia pakhat an ni. Thisen petu KTP branch-te chu - Vaihpi, Shammah, Vahia, Ratlaha leh Smyna branch-te an ni a; thisen pek pawimawhna chungchang inzirtirna hun hman nghal a ni bawk.

MLA-in enfiah

Aizawl South-II bialtu MLA Lalchhuanthanga chuan nimin khan a bial chhunga Mission Veng Bazar a enfiah a, ZPM block leh unit-te a tlawh kual bawk. Lalchhuanthanga chuan, Mission Vengin bazar changtlung zawk leh thianghlim an neih ngei theih nan theihtawp a chhuah dawn tih a sawi a; Mualpuia Animal Slaughter House panna kawng cheng nuai 28 hmanga siam turah hna ṭha leh tlo a nih theih nan thawktute a beisei thu a sawi bawk.

MSHCS CFO

Mizoram sorkar chuan Mizoram State Health Care Society (MSHCS) chief financial officer (CFO) atan Dr K Lalnghinglova, MFAS a ruat thar. Dr K Lalnghinglova hi Mizoram Institutional Finance and State Lottery deputy director hna chelh mek a ni a, MSHCS CFO hna nen thawk kawp tura tih a ni.

Water cooler pe

AMC Ward-XVI bialtu corporator R Lalawmpuii, ZPM Zonu president chuan nimin khan a bial chhunga veng pahnihah tui dah vawhna khawl (water cooler) a pe. Water cooler a pekte chu Bethlehem Veng YMA Hall leh College Veng thlanmual thara hman tur a ni.

Aizawl Lei tifai

U Sawmi Inlêng tia invuahte chu nimin khan Aizawl Lei bul velah hnatlangin, bawlhhlawhte an thian fai a, kawngpui chhak lam koa hnimte an sâm fai bawk.