Aizawlah World Art Day hman a ni

Mizoram sorkar leh International Association of Art - India (IAA) chuan nimin khan IPR Mini Theatre-ah World Art Day an hmang a; National Art Exhibition leh seminar buatsaihin, chief minister Lalduhoma, IAA Mizoram chief patron-in a hawng.

World Art Day hi lemziak thiam Leonardo Da Vinci pian champha April 15-ah IAA-in an hmang ṭhin a; kum 2019 aṭang khan UNESCO chuan pawmpuiin, UNESCO World Art Day tih zui a ni.

CM Lalduhoma chuan, art-in ngawi rengin thu a sawi a, ramri a neih ve loh thu sawiin, "Mizoramin ram dang leh hnam dangte hriat kan hlawhna lian ber chu kan art leh culture hi a ni a, khualzin kan hîp theihna hnâr pawimawh zinga mi a ni. Mite hriat hlawh tur leh khualzin hîp turin kan ram mawi tak leh kan hnam ze duhawm tak te, kan culture tinreng hi kan visual art hmanga kan pho chhuah thiam a ngai," a ti a; ram leh hnam mawina pho chhuak theitute chu artist-te an nih thu a sawi.

Mizoramah lemchan (film) siamtu leh a changtu te, lemziak thiam te, thla la ṭhin (photographer) te, zaithiam leh lâm thiamte'n hma an sawn nasa tih sawiin Lalduhoma chuan, "Film leh photography phei chu eizawnna tling a ni a, visual art nodal department - IPR leh Art & Culture department thawhrimzia kan hriatpui. Sorkarin hma han la ṭhin mah ila, a pawimawh ber chu kan artist-te an ni," a ti a; an kutchhuakah hnam ze ṭhate tilang thei zep tam turin a chah.

Chief Minister chuan, rimawi lamah pawh Mizote an sang tawh tih a sawi rualin, Mizo rimawi hmanrua - phénglàwng, tumphit, rawchhêm, bengbung, Mizo ṭingṭang hrui khat nei leh a dangte kalsan a ni ta deuha a hriat thu a sawi a, "Kan rimawite i hmang uar thar ang u," a ti.

Art & Culture minister C Lalsawivunga, IAA Mizoram patron chuan, Mizoram chu art leh culture-a state hausa a nih thu a sawi a, "Art hian kan nun a kaihruai nasain kan chhawr ṭangkai hle a, kan hlut tial tial dawn," a ti a; World Art Day an hman chuan Mizo artist-te kal zelna turah hlâwkna a thlen ngei a beisei thu a sawi.

IPR minister Dr Vanlalthlana, IAA Mizoram patron pawhin thu sawiin, "Art hian kan hmuh theih loh thil min hmuhtir thei a, kan lungphun hluia lemziakte hmangin kan pi leh pute thuchah kan hre thei a, kan puanahte hian kan pi leh pute themthiamna a inbilh a ni," a ti a; Mizo art, culture leh tradition-te chu a neitu Mizote'n an hlut chuan hnam dang pawhin an hlutsak dawn tih a sawi.

World Art Day hmanna hi Art & Culture secretary Zodingpuii'n a kaihruai a; IAA India president Manaj Saha, goodwill ambassador Biblad Roy, national convener Lubna Hassan te pawhin thu an sawi a ni.