KHAWTHLIR

Thisen pe

Thingdawla YMA branch hrang hrangte chuan nimin khan Thingdawl Vengthar YMA Hall-ah thisen pek an huaihawt a, Kolasib District Hospital tan mipa 11 leh hmeichhia pakuate'n thisen unit 20 an pe.

Lehkhabu lehlin ṭha zual pathum

Mizo Writers Association chuan ṭawng danga ziah lehkhabu, Mizo ṭawnga lehlin kum 2024 chhunga chhuak zinga ṭha ber a thlanna kal zelah a ṭha zual pathum a thlang chhuak a; chu'ngte aṭang chuan lehkhabu lehlin ṭha ber an thlang leh ang. Lehkhabu lehlin ṭha zual pathumte chu 'Hringnun thawnthu ril' (C Ramdinmawia), 'Pa hausa pa rethei' (Lalrinzuala Pachuau) leh 'The 5 Points of Calvinism' (F Lalremsiama) te a ni.

VC hruaitu thlang

All Mizoram Village Council Association (AMVCA) chuan kum 2025-2030 chhunga an hruaitu, office bearer turte nimin khan Vanapa Hall-ah an thlang a; president atan FP Laikhama, Sihphir Venghlun VCP, senior vice president-ah H Lalfakzuala Kawnpui VC-III VCP leh treasurer atan C Lalromawia, Tualpui VCP an thlang.

CM Rubber Mission hmalakna sawiho

Serchhip bawrhsap Paul L Khuma kaihhruaiin nimin khan DC meeting hall-ah Chief Minister’s Rubber Mission hnuaia hmalak dan tur sawiho a ni a; Serchhip district-a ram hectare 100-a zauah ṭhelrêt (rubber) chìn phawt an rel. October 2025 chhungin beneficiary turte thlan a, November thlaah a hmun tur vahtir an rel bawk. Sum senso zawng zawng chu sorkar aṭanga pek tur niin, NABARD aṭanga hmuh tur a ni.

Khawhthlabung teh

Zotrek Adventure Club chuan April 11, 2025 khan Lallen rama Teirei lui tuikhawhthla, Khawhthlabung san zawng an teh a, ft. 253 (metre 77)-a sang a nih thu an sawi. Khawhthlabungah hian Zotrek member mi eng emaw zat an uai thla a, uaithla zingah Agnes VL Rinmawii (kum 10) d/o H Lallawmsangi, Zarkawt pawh a tel. Zotrek chuan, Mizorama tuikhawhthla san zawng an teh fo tawh a, la teh zel an tum thu an sawi.