Japan-a thawk turte Minister-in a thlah

India leh Japan sorkar thawh dunna hnuaia Japan rama caregiver hna thawka kal turte chu nimin khan Labour, Employment, Skill Development & Entrepreneurship (LESDE) minister Lalnghinglova Hmar-in a pisaah a thlah.

India leh Japan sorkarte'n Specified Skilled Worker (SSW) kalpui turin Memorandum of Cooperation (MoC) an lo ziak tawh a, chumi hnuaiah chuan Kobe International University, Japan leh Mission Foundation Movement ten Japanese language course kalpuiin, Japanese ṭawng N4 thleng zir theih a ni.

Japanese ṭawng zir chhuak mi pathumte chu Japan sorkara Ministry of Justice-in Certificate of Eligibility a pek hnuah working visa pek an ni a; Japan rama hna thawk turin nimin khan an chhuak. Hna thawk tura kalte hi auxiliary nursing & midwifery (ANM) zir chhuak mi pahnih leh phamacist pakhat an ni.

Tun ṭum hi MFM leh Japan sorkar thawh dunna hnuaia Japan rama kal tur thawh (batch) hnihna a ni a, tuna mite hma hian caregiver hna thawk turin nursing course zir chhuak mi 24 chu tirh an ni tawh.

Minister Lalnghinglova Hmar chuan, Japan-in an ramah caregiver hna thawk tur an mamawh avangin India ram an rawn hawi tih a sawi a, "Japan rama thawk turin hmel leh pianhmangah anmahni hnaih deuh zawkte tan beisei a sang a, hemi atan hian hma kan la zel dawn. Mizoram nena thawkho turin an inhawng tih an sawi," a ti.

LESDE Minister chuan, Japan rama hna thawh theihna remchang chu India hmarchhaka hnam dangte zingah hman ṭangkai tum an awm tih sawiin, "Keini pawhin he remchang hi kan lak a, kan thawn chhuah loh chuan ṭhenawm state-te'n an thawn chhuak zel dawn a ni," a ti a, ṭhahnemngaih a ṭul thu a sawi.

Lalnghinglova Hmar chuan, Japan rama hna thawk turte chu harsatna tâwk tura inngai turin a chah a, "Harsatnaah mi ṭhenkhat tláwmin lo haw leh awm mah se, nangni chu a hlawhtling zingah in tel ngei dawn nia. A awlsam dawn lo a, in kalna turte hi thil ti tak tak, thil ti thlap thlap an ni. Dan ang taka kal tur in ni a, in tluan ngei ka beisei," a ti.

Japan rama thawk tur thlahnaah hian LESDE director John Ṭanpuia pawhin fuihna thu a sawi a; MFM executive director Lalramchuanzela'n report a pe bawk.