Lungawi lohna lantir titawp turin ngen

Kolasib DC Robert C Lalhmangaiha chuan nimin khan DC conference hall-ah NH-154 kawngpui Bairabi leh a chhehvel thawm ṭhat meka zângnadawmna kaihhnawiha Bairabi Land Owners Association-ion lungawi lohna an lantir chungchangah ram neitute a kâwm a; sorkar laipui thu ngaihchan mek a nih avangin lungawi lohna lantir titawp turin a ngen.

Sorkar thuchhuah tarlan danin, NH-154 (km 42-58) hi Bairabi huam chhung niin, kawng thawm ṭhatna tura ram lak (land acquisition) chu kum 2006-ah tih a ni a, zangnadawmna dawng tur list Kolasib DC-in draft a siamte chu kum 2007 khan pawm a ni. List-a tel lo, ram neitu nia insawite'n sorkarah lungawi lohna an thlen a, sorkarin a bawhzui a, nikum khan joint verification leh assessment tih a ni.

Assesment-ah hian ram neitu 34-te lungawi lohna chu thu tlingah pawm niin, zangnadawmna an lak theihna atan a ṭul anga bawhzui a ni a; state sorkar leh Mizoram PWD (Highway)-in Ministry of Road Transport & Highway (MoRTH)-in zawhna a neih ang angte an chháng tawh. MoRTH thutlukna ngaihchan mek a ni.

Ṭhutkhawmah hian Kolasib DC chuan, ram neitute manganna chu sorkarin a hriat thu leh theihtawpin a ṭul ang anga hmalak a nih thu a sawi a; MoRTH thu ngaihchan mek a nih avangin ram neitute'n contractor-te hna thawk loa an siamna chuan awmzia a neih dawn loh thu sawiin, dawhthei taka MoRTH thutlukna ngaichâng a, an nawrhnate titawp turin a ngen.

Ram neitute pawhin an harsatnaahte theihtawpa hma lakpui turin Kolasib DC leh PWD hotute an ngen bawk.