Kuhva rah ip 411 man dan sawifiah

Taxation Data Collection Centre, Vairengtea Tax official-te'n April 10, 2025 zing dar 1:28 khan truck pali aṭangin ram dang aṭanga lak luh kuhva rah ro ip 411 an man a; hemi chungchang hi sorkar thuchhuahin a sawifiah.

Sorkar thuchhuah tarlan danin, Hauchinkhupa (22) s/o Pausiama, Kawlbem khalh truck MZ-04 9474 aṭangin kuhva rah ip 110, Ngaihkhuala (39) s/o Nginzathanga, Champhai Dinthar khalh MZ-04 A-0306 aṭangin ip 85, Hmangaihsanga (40) s/o C Masthanga, Champhai Venglai khalh MZ-04 A-3464 aṭangin ip 111 leh Liankima s/o Rumliana, Champhai Bethel Veng khalh MZ-04 A-6509 aṭangin ip 105 man a ni a; driver-te hi an tlanbo vek thung.

Truck palite chu Taxation Data Collection Centre, Vairengte-ah ngun taka endik a nih hnuah kuhva rahte chu Burma aṭanga lak luh ngei a ni tih finfiah a ni. Hmalak zuinaah truck khalhtu tlanbo zinga pathum - Hauchinkhupa, Haungaihkhuala leh Hmangaihsanga te chu April 14, Thawhṭani zing dar 4:30 khan man an ni a; Liankima man a la ni lo.