Bru Boisu Festival hman a ni

April 14, Thawhṭanni khan Zomuantlang khelmualah Bru Boisu Festival hman a ni a, minister Lalthansanga'n hmanpuiin, mahni hnam nunphung ṭheuh vawng nung chunga hnam dangte hnam nun zahsak a ṭul thu a sawi.

Lalthansanga chuan, Bru-te'n culture ropui tak an nei tih sawiin, vawng nung tlat turin a chah a, "Mizoramah hnam hrang hrang kan awm a, hnam hrang hrangte hian kan culture leh tradition kan inzah tawnsak a ṭul. Hnam humhalh nana thil ṭangkai leh pawimawh chu ṭawng humhalh a ni a, kan zavai hian kan common language hi kan zaha kan thiam nâl a pawimawh," a ti.

Aizawlah Bru House sak thuai a ni dawn tih sawiin Lalthansanga chuan, ZPM sorkarin Bru-te mamawhte a hria a, an tan hmasawnna hrang hrang thlentir an tum thu a sawi a; sorkar chu Mizoram mipui ta a ni a, a chhawr ṭangkai thiam leh taima apiang tan sorkar a inhawn reng thu a sawi bawk.

Bru Boisu Festival-ah hian hnam lâm leh zaite entir a ni a; State Planning Board vice chairman Dr Kenneth Chawngliana pawhin thu a sawi a ni.