Tui thianghlim chauh hralh turin ngen

Lunglei Municipal Council (LMC) chief executive officer (CEO) Donny Lalruatsanga chuan nimin khan a pisaah Lunglei Tui Zuar Association hruaitute a kâwm a; tui harsat lai a nih avangin tui thianghlim eiin atan tlak chauh phura hralh ṭhin turin a ngen.

LMC CEO chuan, Lungleia tui hralh ṭhinte chu mipui rawngbawl an ni tih inhre reng tur te, tui thianghlim chauh phura hralh tur te, tui a harsat avanga a man tisang lo turtein a ngen a, "Sorkarin LMC kuta thuneihna a pek angin miin LMC huam chhungah sumdawnna a kalpui dawn chuan LMC aṭangin phalna (licence) a neih a ṭul a, he dan hi sumdawnna atana tui phura zuar ṭhinte pawhin in zawm a pawimawh," a ti.

Lunglei Tui Zuar Association hruaitute chuan, tunlaia tui harsatna avangin an duhkhawp tui chawi tur an hmuh loh thu leh, tui chawi tam zawk chu an pawla tel lo an nih avangin inven vek a harsat thu an sawi a, "Kan pawl member-ah chuan tui thianghlim chauh phur turin thu kan chhuah," an ti a; Mat tui chawi si loa Mat tui chawi anga sawi an awm ṭhin chu pawi an tih thu an sawi bawk.