Judicial officer-te Lungleiah dah lêt an ni

Gauhati High Court Chief Justice Ajit Singh chuan nimin khan Lunglei District Court leh judicial quarters-te a tlawh a, Zohnuai mi ṭhenkhatin September 22, 2016-a Court building leh quarters an beihna hnuhmate a enfiah. Chief Justice chuan Lungleia judicial officer-te a lak chhuah vek chu sûtin, nimin khan Lungleiah judicial officer pathumte a dah lêt.

Chief Justice hi Gauhati High Court Aizawl Bench aṭangin judge Michael Zothankhuma leh registrar T Guite ten an zui a; Nilaini zan khan Lunglei an thleng. Lungleia sorkar hotute an kawm nghal a; nimin khan Lunglei Court leh magistrate quarters-te an enfiah a ni.

Chief Justice Ajit Singh chuan, Lunglei mipuiin an lo dawnsawn danah lawmthu sawiin, District Court leh magistrate quarters beih chungchanga sorkar hotute hmalak dan chu lawmawm a tih thu a sawi a, "Kohhran leh tlawmngai pawl hruaitute'n thil thleng chungchangah thuphá an chawi a, Lungleiah Court rorelna dah let turin min ngen a; Lunglei mipuite tana an ṭhahnemngaihna hi zahawm ka ti hle a ni," a ti.

Court rorelna a awm loh chuan mipuiin harsatna nasa tak an tawh theih thu leh chu chu mipui tan veka thil ṭha lo a nih thu a sawi rualin, Ajit Singh chuan, "Judicial officer-te leh Court-a thawktu dangte himna pawh thil pawimawh em em a ni," a ti a; September 22-a thil thleng ang chu a thlen tawh loh a beisei thu a sawi.

Gauhati Chief Justice chuan, sorkar inrelbawlnaah Judiciary ṭha taka a kal zel a pawimawh tih sawiin, "Lunglei mipuite nen thawh­hona ṭha a awm zel ka beisei a, Lungleia judicial officer lak letna order pawh sûtin, Lungleiah dah lêt leh thuai an ni ang," a ti.

Chief Justice Ajit Singh-a sawi angin, Gauhati High Court registrar general HK Sharma chuan nimin khan notification a chhuah nghal a; Lungleia buaina chhuak vanga judicial officer lak chhuahte chu an awmna ngaiah dah let an nih thu a tarlang.

Gauhati High Court notification-a a lan danin, Lunglei district & sessions judge R Thanga, additional district & sessions judge Helen Dawngliani leh civil judge-cum-JMFC R Mal­sawmdawngzuala te chu an awmna ngaiah awm tura tih an ni. Lawngtlaia senior civil judge-cum-chief judicial magistrate Laldinpuia Tlau pawh Lungleiah Circuit Court a neih chhunzawm phalsak a ni.